Утрински навики кои се корисни за Вас

Без разлика на Вашиот ритуал на будење и започнување на новиот ден, некои нешта едноставно мора да ги правите, доколку сакате да ја одржите добрата состојба на Вашето здравје.

Растегнете се веднаш по будењето

Можеби најлошото нешто што можете да го сторите по будењето е одложување на станувањето. „Само уште 5 минути“ всушност ќе Ве направи далеку поуморни во текот на денот. Станете од постелата и растегнете се максимално. Тоа ќе ја поттикне циркулацијата на крвта и ќе Ве расони за неколку минути.

Напијте се вода

Секој ден треба да го започнете со една чаша вода пред да внесете што било друго. Откако поминале помеѓу 6 и 8 часа во кои не сте внесле никакви течности, на Вашиот организам му е потребна вода. Дури потоа треба да размислувате за храна, бидејќи ако прво јадете, тоа ќе ги повлече и последните залихи вода во телото.

Задолжително појадувајте

Појадокот е оброк кој едноставно не смеете да го пропуштите. Кога рано наутро го снабдувате организмот со потребните калории за функционирање во текот на денот, тогаш многу се помали шансите да дојде до недостиг на енергија или пак ненадејни напади на глад во текот на денот.

Размрдајте се

Утринските вежби за размрдување ќе Ви одземат најмногу десет минути, исто толку време колку и пиењето на едно кафе. Но, важноста на утринските вежби е премногу голема за да бидат прескокнати. Доколку вежбате секое утро, ќе се чувствувате порасположено и ќе бидете поведри.

Второто кафе заменете го со чај

Откако ќе го испиете првото кафе, не посегнувајте по второ. Колку и да мислите дека второто кафе Ви е потребно, тоа ќе има само контра ефект – ќе го забрза срцето и ќе предизвика анкциозност. Наместо тоа, напијте се чај.