Важноста на навлажнувачите на воздух за здравјето

Познато е дека последиците од сувиот воздух можат да бидат – сува кожа, испукани усни, иритации на респираторниот систем, астма и потешки воспаленија.

Добрата влажност на воздухот е уште поважна за малите деца и особено за бебињата.

Кога воздухот се суши, доаѓа и до сушење на слузокожата во усната и носната празнина, како и бронхиите во белите дробови, што значително го отежнува дишењето. Бебињата чија слузокожа ќе се исуши имаат огромни потешкотии при дишењето и стануваат подложни на инфекции и иритации.

Исто така, се намалува и капацитетот на имунолошкиот систем, затоа што е потребна добро навлажнета слузокожа за организмот да може да се справи со нападот од бактериите и вирусите, особено во ранливиот период од раното детство.

За да го заштитите своето бебе, неопходно е да набавите навлажнувач на воздух, кој ќе биде подесен на оптимални, од 35 до 55% влажност.

Педијатрите особено ги препорачуваат навлажнувачите со ладна пареа, кои пареата ја создаваат со вртење на диск, наместо со загревање на водата.

Причината зошто овие навлажнувачи се подобри е фактот што кога користите навлажнувач со ладна пареа, се избегнува евентуалната опасност од истекување на жешка вода или случаен контакт на жешката пареа со кожата на бебето.